Inscríbense 37 proxectos de normalización lingüística nos II Premios Mil Primaveras

Tras unha convocatoria interrompida polo estado de alarma, que retomamos en outubro de 2020, co derradeiro día de xaneiro de 2021 finalizou o prazo para inscribir proxectos nos II Premios Mil Primaveras a proxectos de posta en valor e fomento do galego. Nesta segunda edición dos premios recibíronse un total de 37 candidaturas de servizos de normalización lingüística, equipos de normalización e dinamización da lingua galega, asociacións e outras entidades.

Das 37 propostas candidatas, con moita variedade temática e de destinatarias/os, 13 foron inscritas por servizos de normalización lingüística de entidades locais e universidades, 16 foron presentadas por outras entidades públicas e privadas (principalmente asociacións) e oito son accións desenvolvidas en centros educativos. No entanto, algunhas das campañas son froito da colaboración de servizos de normalización lingüística, centros educativos e asociacións ou outras entidades.

Entre as campañas presentadas, a maioría iniciáronse nos últimos tres anos (19), e en concreto nove accións naceron no ano 2020. Hai tamén proxectos consolidados con ampla traxectoria, que pode chegar até máis de 30 anos.

 

Xurado e categorías

Nos vindeiros días a CTNL nomerá o xurado que seleccionará as campañas que serán recoñecidas nesta segunda edición. Estará formado por técnicos/as de normalización lingüística e persoas con recoñecida capacidade en ámbitos como a planificación lingüística, a intervención social, a xestión de proxectos sociais e/ou a comunicación. O xurado escollerá as campañas de acordo coas seguintes seis categorías:

• Premio ao mellor proxecto estabilizado: entre aqueles que se leven desenvolvendo durante, polo menos, cinco anos.
• Premio ao mellor proxecto novo: entre aqueles nacidos en 2018 ou despois.
• Premio á mellor comunicación e impacto: entre os que acadasen un grande impacto social e supuxesen un modelo positivo de comunicación.
• Premio ao proxecto máis innovador: entre os que mostren innovación na súa maneira de intervir, na súa linguaxe, no seu ámbito de actuación etc.
• Premio ao mellor proxecto de fomento do galego na infancia e/ou mocidade: entre aqueles que teñan como obxectivo principal a socialización en galego da infancia ou da mocidade, como poboación destinataria prioritaria na normalización lingüística para garantir o futuro da lingua.
• Premio ao mellor proxecto de fomento do galego nun ámbito sectorial (por exemplo, no ámbito socioeconómico, no das novas tecnoloxías, no audiovisual etc.): entre aqueles que teñen como obxectivo principal a procura do incremento do uso e/ou prestixio do galego nun ámbito sectorial concreto.

Os Premios Mil Primaveras non teñen dotación económica. Consistirán no recoñecemento e na ampla difusión das accións, programas ou proxectos escollidos polo xurado.

Para axudar a dar a coñecer os proxectos premiados, as candidaturas seleccionadas polo xurado estarán dispoñibles para a súa consulta detallada no web www.milprimaveras.gal, onde agora se poden consultar os proxectos premiados na primeira edición. Tamén se difundirán os proxectos premiados a través das canles habituais de difusión da CTNL (redes sociais, web etc.).

Así mesmo, se a situación sanitaria o permitir, organizarase un acto público de entrega, que terá lugar nunha data e lugar que se determinará con suficiente antelación.

Os Premios Mil Primaveras promóveos e organízaos a CTNL coa colaboración económica da Deputación Provincial de Pontevedra e da Secretaría Xeral de Política Lingüística.