Comando Le: grupo de activismo cultural de Espazo Lectura

O Comando Le é un grupo de activismo cultural de Espazo Lectura dirixido a adolescentes a partir dos 12 anos, concibido como un espazo propio de lecer, encontro e creación en lingua galega. Reúnese de forma regular na Casa da Lectura, situada nunha pequena parroquia da vila de Gondomar, e ocasionalmente noutros espazos públicos, ofrecendo á mocidade un contexto no que o galego é a lingua natural para falar, pensar, emocionarse e divertirse.

Nunha etapa vital na que o uso do galego adoita esmorecer, o Comando Le propón experiencias culturais atractivas (lectura, cine, música, obradoiros, debates, accións colectivas) que ligan a lingua ao pracer, á amizade e á expresión persoal. O galego deixa de ser só unha lingua aprendida ou de uso doméstico para converterse nunha lingua vivida.

O proxecto constrúe unha auténtica rede de afectos arredor da lingua e da cultura: un grupo de iguais que comparte intereses, inquietudes e tempo, xerando vínculos de confianza, pertenza e complicidade. Deste xeito, o Comando Le fortalece a identidade lingüística e emocional da mocidade, creando comunidade e garantindo a continuidade do galego como lingua de relación, de experiencias enriquecedoras e de futuro.