Plan de desconfinamento progresivo da lingua galega

Para fomentar o galego desde un centro de ensino secundario con todo o alumnado confinado nas súas casas houbo que botar man da imaxinación e adaptarse ás circunstancias. Para iso deseñouse este Plan de desconfinamento progresivo da lingua galega, que coincidiu en tempo e en fases co plan que o goberno do Estado deseñou nese momento para rematar co confinamento domiciliario ao que nos vimos obrigados/as pola pandemia do coronavirus.

O obxectivo deste plan foi a transición cara a unha nova normalidade lingüística. Foi un plan gradual, asimétrico e coordinado en catro fases, da 0 á III, a un ritmo medio de dúas semanas por fase, desde maio ata o final do curso escolar (finais de xuño). A fase 0, que foi a da preparación da desescalada, estivo dedicada á reflexión e incentivación (vídeos para pensar sobre a situación, crear un lema motivador para ter presente durante as outras fases...). A fase I, inicial, foi de descubrimento. A través de retos, xogos etc., dedicouse, principalmente, a descubrir o que tal hai na música en galego. A fase II, intermedia, foi de práctica interior, e o reto estivo en falar galego na casa (de onde o alumnado nese momento non podía saír...). Poderíase comezar de moitas maneiras, pero a proposta foi facelo cunha actividade na casa, en equipo, para todas as idades, na que hai que ir falando..., polo que comezamos por unha receita en familia. A fase III, avanzada, foi a de comezar a experimentar o desconfinamento tamén social, e facelo a través das redes, con propostas de retos en Whatsapp, Instagram, Tik Tok e vídeo.

A idea foi, polo tanto, incentivar a reflexión (fase 0), axudar a descubrir moitas cousas que hai en galego (I), probar a usalo na casa coa familia (II) e animar a empregalo nas redes sociais co mundo exterior (III), para que así se poida comezar a usalo, sen medo, cando se queira! En definitiva, este foi un plan para contribuír a que a rapazada poida comezar unha nova normalidade lingüística.