Novas

Preséntanse 47 proxectos aos Premios Mil Primaveras

20/mai/2019

A primeiros de abril convocamos os Premios Mil Primaveras a proxectos de posta en valor e fomento do galego co obxectivo de recoñecer e proxectar o traballo ben feito no ámbito da normalización lingüística, valorar e difundir proxectos positivos e seleccionar boas prácticas que poden servir como modelos.

A proposta dos premios tivo moi boa aceptación entre os servizos de normalización lingüística, os equipos de normalización e dinamización da lingua galega, asociacións e outras entidades, que presentaron un total de 47 propostas, dirixidas na súa maioría á infancia e á mocidade. Entre os proxectos presentados, hai tanto accións nacidas nos últimos tres anos coma iniciativas cunha traxectoria consolidada no tempo. Destas propostas, 19 foron enviadas por servizos de normalización lingüística, 18 por equipos de normalización e dinamización da lingua galega e 10 por outras entidades.

 

Xurado e categorías dos premios

A partir de agora, nomearemos un xurado, que estará formado por técnicos/as de normalización lingüística e persoas con recoñecida capacidade en ámbitos como a planificación lingüística, a intervención social, a xestión de proxectos sociais e/ou a comunicación. O seu labor consistirá en seleccionar as campañas que resultarán premiadas nesta primeira edición, de acordo coas seguintes seis categorías:

  • Premio ao mellor proxecto estabilizado: escollido entre aqueles que se leven desenvolvendo durante, polo menos, cinco anos.
  • Premio ao mellor proxecto novo: escollido entre aqueles nacidos en 2017 ou despois.
  • Premio á mellor comunicación e impacto: escollido por acadar un grande impacto social e por supor un modelo positivo de comunicación.
  • Premio ao proxecto máis innovador: escollido atendendo á innovación da súa maneira de intervir, da súa linguaxe, do seu ámbito de actuación etc.
  • Premio ao mellor proxecto de fomento do galego na infancia e/ou mocidade: escollido entre aqueles que teñan como obxectivo principal a socialización en galego da infancia ou da mocidade, como poboación destinataria prioritaria na normalización lingüística para garantir o futuro da lingua.
  • Premio ao mellor proxecto de fomento do galego nun ámbito sectorial (por exemplo, no ámbito socioeconómico, no das novas tecnoloxías, no audiovisual etc.): escollido entre aqueles que teñen como obxectivo principal a procura do incremento do uso e/ou prestixio do galego nun ámbito sectorial concreto.

Os Premios Mil Primaveras non teñen dotación económica. Consistirán no recoñecemento e na ampla difusión das accións, programas ou proxectos escollidos polo xurado. Para axudar a dar a coñecer os proxectos premiados, organizarase un acto público de entrega e as candidaturas seleccionadas polo xurado estarán dispoñibles neste web para a súa consulta detallada. Tamén se difundirán os proxectos premiados a través das canles habituais de difusión da CTNL (redes sociais, web etc.).

Os Premios Mil Primaveras promóveos e organízaos a CTNL coa colaboración económica da Deputación Provincial de Pontevedra.