Novas

A Coordinadora de Traballadores/as de Normalización da Lingua (CTNL) decidiu interromper o prazo para presentar proxectos á segunda edición dos Premios Mil Primaveras a proxectos de posta en valor e fomento do galego. A CTNL toma esta decisión por mor da actual crise sanitaria e estado de alarma, situación extraordinaria que dificulta a participación nesta convocatoria. É intención da CTNL abrir un novo prazo de inscrición no momento oportuno para facilitar a participación das entidades destinatarias. Os proxectos xa presentados non terán que inscribirse de novo.
 

A Deputación da Coruña publicou no BOP de do 21 de febreiro de 2020 a convocatoria da décimo primeira edición do premio “Rosalía de Castro” de Lingua. O obxectivo xeral deste galardón é recoñecer a promoción e dignificación social do noso patrimonio lingüístico. O prazo para presentar candidaturas, que finalizaba inicialmente o 30 de abril, está interrompido.

Desde a Coordinadora de Traballadores/as de Normalización da Lingua convocamos a segunda edición dos Premios Mil Primaveras a proxectos de posta en valor e fomento do galego co obxectivo de recoñecer e proxectar o traballo ben feito no ámbito da normalización lingüística, valorar e difundir proxectos positivos e seleccionar boas prácticas que poden servir como modelos. A primeira edición tivo lugar en 2019 e recoñeceu seis proxectos de normalización da lingua.
 

A Universidade de Santiago de Compostela convoca a terceira edición do Premio Luís Porteiro Garea co fin de recoñecer publicamente o esforzo de persoas ou colectivos a prol da normalización do uso do galego na universidade. O premio leva o nome do profesor da cátedra de dereito civil e membro das Irmandades da Fala Luís Porteiro Garea, quen o día 16 de setembro de 1915 pronunciou no Paraninfo da Universidade a primeira lección en galego de que se ten constancia.

Petiscos Gastrobar (Bertamiráns), Cenlitrosmetrocadrado (O Milladoiro) e Escola de Estudos Musicais Allegro (tamén do Milladoiro) foron as tres empresas escollidas polo xurado desta segunda edición do Premio Lingua e Empresa.

A XX edición dos Premios Manuel Beiras xa ten gañadores: Strelia Electrotecnia, Numax, Sociedade Cooperativa Galega, e a Agrupación Folclórica Cantigas e Agarimos, que reciviron o seu galardón nunha gala que tivo lugar onte no Teatro Principal de Santiago de Compostela.

O Carballo Interplay convoca unha nova edición do Premio ao Proxecto de Webserie en Galego, creado co obxectivo de incentivar e fomentar a creación e a difusión de contidos audiovisuais en lingua galega en Internet.

Este ano 2019 os Premios Manuel Beiras chegan á súa vixésima edición. Estes premios, que convocan conxuntamente o Concello de Santiago de Compostela e a Cámara de Comercio de Santiago de Compostela, teñen por finalidade recoñecer o compromiso coa normalización lingüística no sector empresarial compostelán.

As empresas pontareás Industrias Cárnicas Fontefría, DIE Gabinete Técnico e Máis Vida foron as empresas escollidas para inaugurar o Premio "Ponteareas, Lingua e Empresa", creado este verán polo Concello de Ponteareas.

A Asociación Cultural O Bardo e o Concello da Estrada resolveron a vixésimo novena edición dos seus premios de normalización lingüística. Ana Peleteiro, o Museo do Pobo Galego e a AC Tamparrantán foron a persoa e as entidades recoñecidas respectivamente nas modalidades de "Galicia enteira", "Toda unha vida" e "A Estrada e comarca de Tabeirós-Terra de Montes". O acto de entrega terá lugar no mes de novembro no Teatro Principal da Estrada.